Geiallagas-institutist oceh sämikielâi professor

Mij uuccâp tääl SÄMIKIELÂI PROFESSOR nanodiđ táiđuidân.

Sämikielâi oppâaamnâs kulá humanistlii tieđâkode Giellagas-institutân (https://www.oulu.fi/giellagas). Giellagas-institutist láá kyehti professor, nelji ollâopâttâhlehtor já kulmâ ollâopâttâhmáttáátteijee sehe meriáigásiih ollâopâttâhmáttáátteijeeh. Sämikielâi oppâamnâsist (anarâškielâ, nuorttâlâškielâ já tavekielâ) láá professor lasseen kyehti ollâopâttâhlehtor já kulmâ ollâopâttâhmáttáátteijee sehe meriáigásiih ollâopâttâhmáttáátteijeeh.

Pargo kuvvim

Giellagas-institut lii piergim eromâš pyereest aalmugijkoskâsii tutkâmuš tääsi árvuštâlmist. Sämikielâi kuávdáš tutkâmsyergih tááláá ääigi láá kielâ ráhtus tutkâm, kielâkontakteh, kielâhistorjá, noomâi tutkâm já sämikielâi iäláskittem. Giellagas lii ärbivuáválávt tiäduttâm oovtâstpargo säämi kielâsiärváduvâiguin máttááttem já kielâvuávám syergist.

Pargo ana sistees tieđâlii tutkâm, ton ovdedem já stivrim, jotkâtođhosškovlim, tutkâmušân vuáđuduvvee máttááttem já ton ovdedem, uáppučáittusij stivrim, aalmugijkoskâsii já aalmuglii oovtâstpargo, ohtsâškodálii vaiguttem já eres ollâopâttâhsiärváduvlijd pargoid 1612 tiijme olespargoääigi já jyehi ive soppum pargoäigivuávám raamij siste. Tutkâm- já máttááttempargoh lohtâseh sehe sämikieláid já sämmilii kulttuurân.

Valjimkritereh

Professor tooimâst mij vaattâp

• tuáhtár totkos
• ollâtásásii tieđâlii tohálâšvuođâ
• hárjánem tieđâlii tutkâm stivriimist
• tááiđuid adeliđ já ovdediđ ollâtásásii já tutkâmušân vuáđudum máttááttâs já stivriđ uáppučáittusijd sehe čááitu jieijâd tutkâmsyergi aalmugijkoskâsii já aalmuglii oovtâstpargoost
• tááiđu toimâđ akatemlii hoovdâ roolist
• ucemustáá oovtâ sämikielâ uáli šiev tááiđu
• njyebžilis suomâkielâ já eŋgâlâskielâ tááiđu.
• sämmilii kulttuur tubdâm.

Mij vyerdip tust noonâ čááitu tutkâmušâst ucemustáá oovtâ já rijttájeijee čááitu nube sämitutkâmuš uásisyergist. Mij anneep áárvust tuu tiäđuid, tááiđuid já hárjánem ulgguubiälásii tutkâmušruttâdem hahâmist, tutkâmušhaavâi já -juávhui stivriimist, aalmugijkoskâsii viärmádâtmist, tiettuikoskâsii já/tâi maaŋgâtieđâlii tutkâm- já ovdedemoovtâstpargoost sehe máttátmist, jotkâtođhosškovliimist já uáppučáittusij stivriimist. Valjiimist ánsun mij keččâp ton lasseen tuu čááitu ohtsâškodálii vaaigutmist já tiettuu popularisistmist.

Ucâmušân tun koolgah lahteđ tutkâmuš já máttááttâs ovdedemvuávám. Vuávám kalga kuoskâđ sämikielâi válduamnâsân já ton ohtâvuotân sämikulttuur oppâamnâsân sehe humanistlii tieđâkode kielâi já kirjálâšvuođâ tođhosohjelmân. Ton lasseen tun puávtáh pyehtiđ oovdân jieijâd vuávám ohtâvuođâ humanistlii tutkâm- já máttááttâsstrategian (<https://www.oulu.fi/sites/default/files/content/Humanistinen_strat_2020_A4_fi-ja-eng_valmis%20%28002%29.pdf>) já profilaatiohavváid sehe máhđulijd uđđâ, pajaneijee tutkâmsundijd.

Tohálâšvuotâvátámušah láá miäruštâllum 1.1.2016 vuáimán puáttám Oulu ollâopâttuv njunošnjuolgâdusâst.

Mij faallâp tunjin

Mij faallâp tunjin máhđulâšvuođâ leđe porgâmin ávhálii pargo, mon puátuseh spejâlisteh ohtsâškoodán nuuvt páihálávt, aalmuglávt ko gloobaallávt. Tun peesah huksiđ puátteevuođâ tááiđuid sämikielâi suárgán, mii puáhtá ovdediđ sehe syergi já sämmilij siärváduvâi nanodem já pyereestvaijeem. Ton lasseen tun peesah navdâšiđ stuorrâ organisaatio hiäđuin jieijâd tiäđui já tááiđui ovdedem várás já peesah porgâđ suotâs pargopirrâsist hárjánâm siärváduv torjuin. Mij faallâp tunjin meid uđđâáigásijd pargopiergâsijd, njyebžilis maaŋgâsajepargo máhđulâšvuođâ já maaŋgâpiälásii lihâdem- já kulttuurhiäđu.

Pälkki

Pargo sajaduvá ollâopâttuv pälkkivuáháduv máttááttâs- já tutkâmpargovievâ vátávâšvuotâtáásán 8–9. Ton lasseen máksoo persovnlii čođâlditmân vuáđuduvvee päälhiuási, mii lii enâmustáá 50 % pargokuáhtásii päälhiuásist. Pargokoskâvuođâ aalgâst tuu mánuppajepälkki lii suullân 5 800–6 500 eurod. Pargo lii vyeimist tuáistáážân já tot tiävdoo 1.1.2023 rääjist tâi sopâmuš mield. Pargoost heiviittuvvoo 6 mánuppaje keččâlâddâmäigi.

Uuccâmravvuuh

Tooimât jieijâd eŋgâlâskielâlii ucâmuš lahtosijdiskuin rekrytistemvuáhádâhân majemustáá 31.3.2022. Laavte ucâmušân:

1. Motivaatioreeivâ (maks. 2 siijđo), mii ana sistees čuákánkiäsu pargo tááhust kuávdáš hárjánmist já tááiđuin, já kuvvim, mondiet tun uusah eidu taam pargo já mondiet eidu tuu kolgâččij valjiđ.
2. Curriculum vitae (maks. 10 sijđod), mii kalga čuávvuđ Tutkâmušeettisii ráđádâllâmkode ravvuid:<https://tenk.fi/fi/ohjeet-ja-aineistot/tutkijan-ansioluettelomalli>.
3. Olgosadelemluvâttâllâm, mielâstis DOI-tubdâlduvâiguin, mon rááhtus kalga čuávvuđ Suomâ Akatemia olgosadelemkategoriaid lohtâseijee ravvuid: https://www.aka.fi/en/research-funding/apply-for-funding/how-to-apply-for-funding/az-index-of-application-guidelines2/list-of-publications/

Merkkii love olgosaddelmid, moh láá pargo tááhust puoh tehálumoseh.

1. Uánihis kuvvim tutkâmáánsuin (maks. 2 siijđo)
2. Uánihis kuvvim máttááttâsáánsuin tâi máttááttâsportfolio (maks. 4 siijđo), uárnejum čuávuvávt:
   1. Máttááttâsjurdâččem já kuvvim alnestis máttáátteijen
      • máttááttâs stivrejeijee tuávášjurdâččem, máttááttâs persovnlâš tuávášjuurdâ; maht tot tiättoo máttááttempargoost? Kuvvim alnestâd máttáátteijee já máttááttempargo pargen.
   2. Máttááttempargoost čoggâšum keevâtlâš hárjánem já máttááttâs ovdedem
   3. Oppâmaterial pyevtittem já kevttim
   4. Jieijâs máttááttemtááiđui paijeentoollâm
   5. Máttááttâsâst čoggâšum macâttâs (uáppei árvuštâlmeh, viärdásij árvuštâlmeh, palhâšumeh já tuhhiittum máttááttâsčáittuseh)
   6. Máttááttâs ovdedem visio
      • pargee muštâl uánihávt jieijâs vuáváámijn jieijâs máttááttâs já máttááttempargo ovdedem várás aldapuátteevuođâst
3. Kuvvim hahhum tutkâmušruttâdmijn (maks. 2 siijđo)
4. Uánihis ovdedemvuávám sämikielâi syergi tutkâmuš já máttááttâs várás (maks. 3 siijđo)

Valjimproosees

Valjiimist nuávdittuvvojeh Oulu ollâopâttuv rekrytistemravvuuh. Valjimproosees valmâštâl nomâttum valmâštâllâmjuávkku, já occei almottem olgosadelemluvâttâlmij vuáđud tahhoo olgosadelemanalyys. Pyeremuid occeid tahhoo ulgguubiälásâš, akatemlâš äššitobdeeárvuštâllâm. Árvuštâlmist tárkkojeh čuávuvááh jiešvuođah:

• tieđâlâš toimâm já ton spejâlistem olgosadelemtooimân, tieđâliih oovdânpyehtimeh já tubdâstâsah já palhâšumeh
• máttááttâsáánsuh já toi árvuštâllâm (máttááttâsportfolio, fáárust meid uáppei adelem árvuštâlmeh)
• tođhos- já náguskirjeuáppei stivrim
• kištottâllum ruttâdem haahâm
• aalmugliih já aalmugijkoskâsiih viärmáduvah
• tooimâ akatemlâš já ohtsâškodálâš merhâšitteevuotâ já potential.

Mij sättip povdiđ puoh ánsulumos occeid adeliđ uáppučáittus taan pargokoskâvuođâ suárgán kullee fáádást, mii meriduvvoo sierâ, já sättip orniđ sijjân tilálâšvuotâ, mon ääigi sij pyehtih njálmálávt pyehtiđ oovdân jieijâs uáinuid tooimân kullee pargoi oovdedmist.

Lasetiäđuh

Lasetiäđuid pargoost adelává Giellagas-institut hovdâ Anni-Siiri Länsman, anni-siiri.lansman@oulu.fi, puh. 040 518 3781 já deekaan Paula Rossi, paula.rossi@oulu.fi, puh. 050 350 6609.